王雙駿首談辭任英皇騷總監 強調無不和 更聚焦霆鋒演出
香港文匯報訊（記者 梁靜儀）王雙駿昨日出席第四屆「亞藝無疆」藝術節，開幕節目《三角演義》音樂會將夥拍恭碩良、本地樂手及蒙古、韓國、泰國樂隊跨界演出，並透露將融入香港數十年電影與音樂元素。會後王雙駿接受訪問，問到跟不同國家地區組合合作在溝通上可有出現問題？他表示溝通上沒有大問題：「語言上主要係用英文，到目前為止都好順利、愉快，玩音樂啲人，其實很簡單，只要件事好玩，技術上只要你做到，大家就很容易夾到。」
談到他早前辭任《25+英皇群星演唱會2026》的音樂總監一職，王雙駿首度解釋，其實都是美麗的誤會：「由我開始接觸、決定要做這個騷嘅時候，我個崗位係設計成個演出嘅音樂、有關團隊去商討應該點做個騷，但無奈又牽涉到好多藝人，而嗰班藝人亦都唔係好得閒嘅人，一直都冇機會面談，對我嚟講係比較困難，因為我很難知道大家有咩想做，這件事持續咗好幾個月，去到後期，我又好明白每一位藝人都有自己嘅考量或想法，既然大家都有自己的想法，公司又冇異議，我覺得唔緊要囉，唔係咩一件好大件事。」他強調雙方沒有不和：「其實我哋仍然好愉快，我同團隊、公司、各位藝人都好愉快，其實係一個好理性嘅決定，唔係我有咩情緒，我哋各人只係去諗，點樣令個騷順利進行，嗰個係我個人問題，我行後一步，冇影響成個大局咪ok。」他謂這樣就可以更專注地處理謝霆鋒的演出部分，及繼續推進其他部分的準備工作，其實這是最適合的安排。
對於霆鋒演出突然刪減，事後惹來觀眾及網民不滿，王雙駿稱明白大家的期望：「我完全明白，你問我，我都覺得唔夠，但唔緊要，佢唔係告別演出，同佢做緊巡迴，佢仍然好hyper、好熱情對待音樂，我哋可以期望下一次。」
