任《歌手2026》聯名賽助演嘉賓 曾比特與竇靖童聊音樂說不停
香港文匯報訊（記者 子棠）曾比特（Mike）日前為《歌手2026》聯名賽擔任助演嘉賓，與竇靖童（童童）合唱經典歌《半點心》，二人雖然從未合作過，但一埋位就火花四濺！事緣今次選曲是童童的主意，Mike指童童一口氣掟出五六首參考作品，他掌握方向之後再注入自己想法，整個編曲討論過程十分順暢。他大讚童童是一個勇於嘗試的音樂人，「我哋試過諗不如一開始唔要鼓，營造靜啲嘅感覺，甚至舞台動作設計都一齊傾，成個過程好easy going，係一個好fun嘅體驗。」
講到合作前的印象，Mike自爆曾經於節目中翻唱過童童的《Monday》，一直很欣賞對方那種chill之餘又有vibe的風格。他坦言最初以為童童是文靜I（內向）人，擔心溝通會有阻礙，但一講到音樂，大家即刻變開籠雀，「佢I人面孔底下其實好熱愛音樂，仲要係一個好有趣嘅人！因為我好鍾意講爛gag，每次我講爛gag嘅時候，佢都好捧場，好有反應畀我，好畀到情緒價值我，好鍾意同佢做朋友。」
不過最搞笑的是Mike指二人合作過後，身邊同事大讚「童童真係好可愛、好善良、好有趣」。Mike無奈笑說：「我突然間feel到自己喺呢個同事心目中嘅地位不保呀，哈哈。」
