曾比特「爛gag」結緣 夥竇靖童合唱經典
獲邀擔任《歌手2026》聯名賽助演嘉賓
曾比特（Mike）日前受邀擔任《歌手2026》聯名賽助演嘉賓，與竇靖童（童童）搭檔演繹經典金曲《半點心》。兩人雖然從未合作過，卻完全零生疏、開嗓即火花四濺，舞台表現驚艷全場；Mike透露與童童熟絡源自「爛gag」，「每次我講爛gag嘅時候，佢都好捧場，好畀到情緒價值我！」Mike今次不但贏到舞台掌聲，更賺多一個知音老友。
這次的選曲原來是童童的主意，Mike指童童一口氣掟出五、六首參考作品，他掌握方向之後再注入自己想法，整個編曲討論過程十分順暢。他大讚童童是一個勇於嘗試的音樂人，「我哋試過諗不如一開始唔要鼓，營造靜啲嘅感覺，甚至舞台動作設計都一齊傾，成個過程好easy going，係一個好fun嘅體驗。」講到合作前的印象，Mike自爆曾於節目中翻唱過童童的《Monday》，一直很欣賞對方那種chill又有vibe的風格。
講到音樂即變開籠雀
Mike坦言最初以為童童是文靜I人（內向），擔心溝通會有阻礙，但一講到音樂，大家即刻變開籠雀，「佢I人面孔底下，其實好熱愛音樂，仲要係一個好有趣嘅人！因為我好鍾意講爛gag，每次我講爛gag嘅時候，佢都好捧場，好有反應畀我，好畀到情緒價值我，好鍾意同佢做朋友。」
不過最搞笑的是，Mike指二人合作過後，身邊同事竟然跟他說：「童童真係好可愛，好善良、好有趣。」Mike無奈笑說：「我突然間feel到自己喺呢個同事心目中嘅地位不保呀！」
