《西遊記》經典電影修復版首映 羅家英感恩《Only You》紅足30年
香港電影資料館推出「對話西遊」節目，分別在東九文化中心（東九）劇院和資料館電影院放映3組、共6部，風格各異、來自不同年代改編名著《西遊記》的經典電影作品。日前在東九劇院為節目打響頭炮是經過資料館全新4K數碼修復的《西遊記第壹佰零壹回之月光寶盒》（1995）及《西遊記大結局之仙履奇緣》（1995）的世界首映。參演《西遊記大結局之仙履奇緣》的羅家英亦有到場，大談拍攝感受。
●香港文匯報記者 阿祖
在《西遊記第壹佰零壹回之月光寶盒》修復版正式放映前，資料館先播放早前特意邀請導演劉鎮偉和戲中演員莫文蔚分別拍攝的分享短片，劉鎮偉說：「這部電影能夠喺東九文化中心劇院同大家見面，都算係一個緣分。」莫文蔚憶述說：「原來呢部電影不經不覺已經係31年前嘅作品，每次睇返都覺得非常驚喜同精彩，當年拍嘅每一個畫面到現在都歷歷在目，好多朋友都好鍾意我嘅角色白晶晶，非常榮幸同埋好開心曾經有份參與呢部香港經典嘅電影作品！」
《西遊記大結局之仙履奇緣》（4K數碼修復版）緊接進行世界首映，羅家英在台上大談當年拍攝時的趣事。家英哥在電影中飾演形象百變的唐僧，還懂得說英語，他笑說：「其實識英文同埋唱英文歌係唔奇怪嘅事，點解呢？我有月光寶盒，去到邊度用都得，去到美國仲學識咗《Only You》，同嗰幾個黑人做咗兄弟，月光寶盒返到嚟我咪唱《Only You》囉！」
難忘跟周星馳「爆肚」對戲
「每一次睇呢部電影都覺得人生能夠拍到幾套好嘅戲？能夠流傳畀觀眾欣賞？因為呢一齣戲而出名，我覺得不枉此生。」家英哥坦言從沒想過扮演唐僧這個角色令他得到那麼多：「總之有任何工作找我，我就會盡全力去拍去做，有咩效果拍嘅時候我係唔知，出咗嚟先知。有咁嘅效果係一個夢想同意外，真係好開心！」至於飾演唐僧一角爆紅超過30年，喜獲許多登台機會，家英哥表示：「一首《Only You》，呢30年都令我搵到啲錢，《Only You》對我嚟講係令我懷念嘅一首歌。」他亦提到在電影中最難忘跟周星馳合作：「有一段對白『你要曳曳啦！你要同我講㗎嘛！冇理由你要又唔畀你，我又夾硬畀你，咁究竟你要定唔要呢？』呢段台詞係臨時發揮冇劇本。」
