巴西大勝蘇格蘭 首名出線
尼馬闊別981日後回歸
世界盃C組最後一輪傳來「森巴兵團」的最大喜訊。巴西昨晨藉雲尼斯奧斯祖利亞梅開二度及馬菲奧斯根夏建功，以3:0大炒蘇格蘭，憑較佳得失球差壓過同分的摩洛哥，以首名資格晉身淘汰賽。然而，費城球場全場焦點，無疑是巴西球星尼馬在經歷漫長傷患後，終於在下半場後備上陣，闊別長達981日後再次披上巴西隊戰衣，為森巴軍團的衝冠之路注入最強強心針。
自2023年10月左膝遭遇前十字韌帶與半月板撕裂的重創後，尼馬經歷了近3年的漫長復健。為了趕上4年一度的世界舞台，他甚至毅然回歸母會山度士，爭取更多實戰時間。儘管因小腿傷勢缺席了今屆首兩場分組賽，但今仗戰至76分鐘，這位隊史射手王終於在全場歡呼聲中入替根夏，第4度踏上世界盃舞台。
久休復出的尼馬毫無生疏之感，在短短20分鐘的上陣時間內展現頂級身手。他錄得24次觸球、12次成功傳球（包括3次關鍵傳球），末段一次標誌性攻門更成功命中目標。主帥安察洛堤賽後大讚：「尼馬態度認真，值得呢次出場機會，我相信佢未來可以進一步幫助球隊。」
賽後尼馬激動落淚，他直言復出戰心情無比緊張：「我嘅心跳不斷加速，可以再次穿上國家隊戰袍出賽，我只有純粹嘅感激。」梅開二度的功臣雲尼斯奧斯亦興奮表示：「我哋嘅偶象終於返嚟啦！佢竭盡全力同大家並肩作戰，希望佢嘅狀態能夠繼續提升！」隨着「精神領袖」強勢回歸，「足球王國」巴西可以開足火力，迎接淘汰賽來臨。
海地憾負摩洛哥贏掌聲
同組另一仗，賽前兩戰全敗已篤定出局的海地，踢出爭氣波兩度領先，開賽10分鐘因對手門將辛尼保奴擺烏龍先開紀錄，及後雖被摩洛哥夏基美扳平，但効力新特蘭的射手威爾遜伊斯多，於43分鐘射入精彩世界波助海地再領先。不過摩洛哥畢竟技勝一籌，完半場前先由連續3仗入波的沙巴利扳平，下半場再由拉希美及耶辛尼各建一功，摩洛哥終贏4:2以次名出線。不過海地勇猛而精彩的表現，已經贏盡球迷掌聲。
