運動煉心志 Gordon圓舞蹈夢
前組合「天堂鳥」隊長葉泓聲（Gordon）近年成為獨立歌手，失去公司作後盾，他坦言要自負盈虧，雖然贏輸未知，但成功會更有成就感。Gordon提到自小因熱愛運動而能訂立清晰目標，最終如願成為舞蹈員，未來希望繼續為舞蹈界出一分力，趁年輕多跳舞，並透過快歌演繹更多舞蹈作品。
Gordon喜歡打籃球、足球、排球、欖球及游泳，現時更是香港明星足球隊成員之一。他認為運動除了可帶來開心外，還可令頭腦清醒：「做運動時令到我嘅目標更加清晰，所以好細個已定好晒點樣行，就係做舞蹈員。因為我偶像係郭富城，18歲要去紅館跳舞，託賴，成功咗。」
Gordon坦言從小已是運動高手，尤其是田徑運動，「實不相瞞，我中學時期係跨欄高手，呢個項目為我帶來好多獎項，當時讀本地學校，聯校去澳門比賽，贏咗個金牌，原本我以為去唔到聯校比賽，因為曾經試過大家都視我為大熱，結果跨欄比賽時跌咗兩次，有時比賽得意之處，就係你好有信心、係大熱，但會大熱倒灶。」他認為就像其演藝生涯，經歷多次起起跌跌。
