租盤sell敘利亞風裝修 網民覺身痕嘆送都唔要
香港地寸金尺土，平靚正租盤長期供不應求。近日網上就有一則租盤廣告，以吸睛價每月5,000元放租鄰近屯門碼頭一個住宅單位，更以「敘利亞風格裝修」作招徠。帖文引發網民關注，但一面倒對租盤有彈冇讚，揶揄「睇到個身都覺得痕……」、「送畀我都唔要啦」；更有網民指單位疑似公屋，質疑是否符合出租規定。
日前Fb群組「免佣套房出租」上載一段放租帖文，樓主描述指「屯門區近碼頭，業主免佣，敘利亞風格裝修，鄰近交通配套方便，月租5,000，拎包入住，PM詳細資料」。從多張相片可見，天花板及牆身均有大量油漆剝落，室內堆滿大量傢具雜物，走廊位置還放有輪椅、唧車及籠車等大型物件，令單位倍感迫狹。
帖文惹網民熱議，其中殘舊裝修更成焦點，「好一個敘利亞風格裝修」、「敘利亞你噏得出先好嘢，佩服你有租出去嘅勇氣」、「估唔到真係有咁有特色嘅屋」、「睇見都唔想行入去」、「睇到起雞皮」；網民普遍認為單位環境欠佳，平租5,000元亦難入住。
鐵閘推算疑似公屋單位
此外不少網民更從相片推算，質疑租盤屬公屋單位，「睇個閘都知係公屋」、「公屋租畀人係咪買咗補咗地價先？」、「XX邨好似冇租置計劃㗎喎，咁係咪即係舉報得？」根據《房屋條例》第28A條，嚴重濫用公屋列刑事罪行，違例分租或轉租，最高可罰款50萬及監禁一年。
