家怡苦練鋼管舞 新作入選上影節
周家怡主演電影《媽樣年華》近日入選「上海國際電影節展映單元」，日前她和導演一齊現身上影節，同內地觀眾見面。家怡對於今次入圍非常興奮，「最希望可以去多啲唔同嘅電影節，等更多人睇到我哋香港嘅作品。」
家怡在片中演媽媽角色，她大笑指：「其實已經唔係第一次，做咗好幾年媽媽，我都諗緊係咪好快要做阿嫲，哈哈。」又指今次最大挑戰是要跳鋼管舞：「以前從未試過，過程都幾辛苦，但係好好嘅體驗，好有成功感。」不過練習期間家怡試過骨裂，要休息個半月，但為免耽誤劇組，未完全好番就即刻重新投入訓練。
談到戲中最感動一幕，家怡稱之前香港試映，現場有很多媽媽觀眾睇到眼濕濕，認為電影能帶出觀眾的共鳴，已經是對演員一種肯定。她還分享同媽咪的難忘事：「前幾年媽咪隻腳行得唔好，我朝朝捉佢去跑步，帶佢睇物理治療師，跑完步再帶佢食嘢，等佢開心啲。嗰陣佢要揸拐杖，而家唔使啦，間中都仲會跑步。」
