女童差0.1cm高被拒玩海盜船 家長發難掀熱議
網上瘋傳兩段短片，顯示有父母帶女兒到海洋公園排隊玩海盜船，因女童身高差「0.1cm（厘米）」未達最低要求被拒乘坐，涉事父母情緒激動狂鬧職員，導致海盜船一度暫停。網民力讚職員嚴守安全規定「做得好」，不諱言「差0.1就係差0.1，萬一出事嗰陣點算，咁都係保障細路同保障樂園」。
片段可見涉事父母情緒激動表示「佢啱啱玩完」，職員安排女童再次度高，但證實尚欠0.1厘米才達要求，拒絕放行。該對父母未肯罷休，兩職員則不斷解釋安撫。期間海盜船有遊客不滿鼓譟嗌道，「開船，成村人等緊你喇。」
翻查海園官網，海盜船身高要求為122厘米（48吋）。帖文在Threads掀起熱烈討論，網民皆認為職員按指引辦事正確，更形容該對父母為「怪獸家長」，「安全條例無得講人情，機動遊戲差0.1cm就係扣唔實，職員堅持原則先係真正負責」、「為難職員、阻住後面成班排隊嘅人，就真係好自私，仲做埋最壞嘅身教」。
