港東港西/故宮館7·1免費開放 門票個半鐘搶光\鄭晴
就快到7月1日全城同賀香港回歸29周年，市民紛紛關注各項優惠與精彩活動，其中香港故宮文化博物館及M+的指定展覽，將於7月1日免費開放予公眾參觀，想免費參觀故宮博物館（展廳1至7）的訪客，需預先登記標準門票。免費門票昨日中午10點開搶，即刻掀起全城撲飛熱潮，「手快有，手慢無」，個半鐘已經將免費票一掃而空，非常受市民歡迎，亦反映市民對7月1日連串優惠活動那種「等到頸都長」的興奮心情！
M+展覽免費參觀 毋須預約
鄭晴提提你，當日毋須預約便能免費參觀M+指定展覽，但記住要用藝術廣場入口入場，當日部分出入口將會關閉。為確保訪客參觀體驗，M+會按情況實施人潮管制，到時可能要跟着工作人員指示排隊輪候。博物館朝10晚8開放，大家有充裕時間慢慢行。
鄭晴打聽過，如果想睇故宮館或M+的特別展覽，上網或現場買票都可以。訪客憑故宮博物館特別展覽門票，可同時參觀相關特別展覽及專題展覽；而持當天M+門票的訪客可優先進入兩個展覽，以及到訪位於博物館11樓、平日僅供M+會員及贊助人享用的M+會館。機會難得，咪走寶！
