大叔當路障合演人肉霸位 機智司機攝位KO大快人心
本港路邊泊車位長期供不應求，車主使橫手「人肉霸位」時有所聞。有網民近日就在Fb「車cam L（香港群組）」上載車Cam片，直擊有電動車主在灣仔慶雲街炮製「人肉路障」，遙控一名大叔企正路中央，圖阻尾隨車輛泊入左邊空置錶位，繼而遠距離倒車半條街準備駛入，卻遇上機智樓主趁大叔一時鬆懈退至路壆，突然加速標前將車頭攝入車位，令電動車「敗走」收場。帖文獲網友狂讚「好波」、「頂得好」，坦言「大快人心」、「證明正義一方勝！讚！」。
車Cam片長約1分鐘，顯示事發於本周一（1日）傍晚，一名中年大叔為協助電動車倒車泊位，不惜做「人肉路障」在路中心阻擋其他車輛前行，但當大叔以為錶位已搶佔得手，逕自退回行人路時，冷不防樓主趁機加速攝位，用車頭頂着正在「尾入」的電動車，令「人肉霸位」功敗垂成。
帖文一天獲逾千個讚好，網民大讚「靚插」、「快狠準」、又二創「足球小將」歌詞笑謔「頂得好，插得鬼馬，可稱霸只有他」，有網友更鬧爆「呢啲人肉X絕對要鬥頂……至多一拍兩散益下家」、「唔X唔鬆化」。
此外大叔更被揶揄是「豬隊友」，衰太老定幫倒忙，網友笑稱「點解佢要行開？」「頂咗咁耐先怕醜走開？」「以為十拿九穩」、「阿叔輸經驗」。亦有網民提到「人肉霸位」可能犯法，「褪後咁多個車位已經可以告不小心駕駛」、「1823可以告，因為影響他人」、「所有人肉霸位一律違反cap228，Section 4A！請警方大力執法」。
簡易治罪 可被罰款或判監
據《簡易程序治罪條例》4A條，任何人無合法權限或解釋而陳列或留下，或導致陳列或留下任何物品或東西，而對人或車輛造成阻礙、不便或危害者，可處罰款5,000元或監禁3個月。
