SUV剷壆飛起猛撼七人車 網民驚嘆「以為拍緊戲」
近日網上流傳一段車Cam短片，情節恍如電影特技飛車場面引發關注。片段顯示一輛七人車及SUV運動型多用途車，上周六分別沿西沙路右二線及右一線往烏溪沙方向行駛，駛至恒輝街迴旋處時，SUV駛入支路卻沒扭軚轉彎，反而直衝路中心石壆，再剷上石壆凌空飛起，落地時再猛撞向七人車。七人車被撞後司機即剎停車輛，SUV則繼續衝前一段距離始停下。
片段近日被網民放上Fb群組並留言道「睇得出你好趕時間…」，吸引網民紛紛留言：「唔講以為拍緊戲」、「成功超車」、「拍戲未必做到依個咁好效果」、「一TAKE過搞掂，唔使NG」、「嘩！錢家班都認輸」、「好有警察故事feel」。
亦有網民狠批SUV司機駕駛態度有如「馬路炸彈」，「冇明顯扭軚動作，一路行直線，似係發緊夢/玩緊電話」、「真唔明啲人，寧願炒車都唔行錯路」。
據悉，涉事SUV的58歲男司機及七人車的50歲男司機均無受傷，警方正調查意外原因。
