香港明星籃球隊「星BA」推出隊歌
香港文匯報訊（記者 阿祖）由高鈞賢任隊長、隊員包括莊思敏、關楚耀、彭迪安、黎澤恩、譚傑明、唐嘉麟、陳柏曦等組成的香港明星籃球隊「星BA」，早前在佛山參與籃球邀請賽時，已率先在球場演繹隊歌《Together we play》，成功炒熱氣氛。該曲日前正式派台，各成員有份參與錄音分外高興。
向來熱愛籃球運動的高鈞賢，稱當初收到《Together we play》的demo時心情特別激動：「我對籃球嘅熱愛同熱情，一直都冇改變，但真係冇諗過自己隊波可以擁有自己嘅主題曲，大家好齊心完成咗呢段咁熱血沸騰嘅事，真係覺得好青春。雖然大家已唔係咁青春，但仍然有呢份熱誠，呢種感覺好多年冇感受過。」高鈞賢最開心是未足一歲半的女兒都非常欣賞這首歌，他笑說：「我個女好鍾意唱歌，又好鍾意打波，佢每次聽到呢首歌都會好興奮喺度搖。」
非歌手出身的莊思敏坦言錄音過程很新鮮：「唱歌絕對唔係我強項，今次走入去錄音室雖然好緊張，但幕前幕後工作人員都畀我好大信心，亦畀我好多幫助。今次係首合唱歌，所以錄起上嚟算比較輕鬆。」莊思敏開心一班志同道合的藝人朋友藉着籃球這項運動，可以多抽時間聚在一起，亦藉着這首歌令球隊更加熱血，讓支持他們的粉絲都可以有首歌一齊大合唱。
彭迪安表示，這次錄音讓他重拾當年男團EO2的感覺，而今次參與錄歌的人比EO2時更多，氣氛更好。唐嘉麟自言不懂唱歌，但發揮了創作能力，加了段Rap在主題曲上，希望大家會喜歡。
