楊思琦不介意與前度李泳豪合作 王祖藍影視減產轉「炒散」
楊思琦與王祖藍昨日出席汽車品牌活動，近日成為話題人物的思琦對於半億身家的傳聞，她避而不談，但主動為自己被指演技差、吝嗇的問題作出平反，她稱想再拍無綫劇集，更自言是專業演員，不介意與前度李泳豪合作；王祖藍則因影視工作減少，要轉型「炒散」。 ●香港文匯報記者 梁靜儀
楊思琦昨日偕同兒子Kody及媽媽出席活動，她與王祖藍更成為新車首批車主。自認是「慳妹」的思琦，透露一直想買電車，並是家人的專業司機，今次獲優惠價購買新車，所以帶同細仔幫忙挑選。記者問她何時換大屋？她笑言承大家貴言。有傳她坐擁5個物業，身家半億，她避而不談，只推說當中有些是家人的：「我都唔知，有啲係屋企，唔關我事。」
思琦稱與丈夫財政獨立
思琦幽默笑指「衫褸」有好多：「我係小康之家，大家抬舉我喇，我努力工作都係想家人生活舒服啲。其實我冇去計有幾多，我有好多支出，要供樓養家，我唔係富豪生活，否則不用成日直播。（老公呢？）大家財政好獨立，我由細到大都好獨立。（佢冇幫你分擔？）呢啲我唔使同大家講，總之女孩子做到獨立又自強係好可愛，我不用依靠。」至於可有叫老公送電車？思琦豪氣地說：「使乜人送！自己買，我係女強人。」至於有傳她一個月帶貨賺幾百萬，她說：「太誇張喇，人哋會追我，千祈唔好咁講，但我會向住你哋畀我嘅鼓勵去努力。」
近日無綫深夜重播她與佘詩曼及郭羨妮主演的劇集《無名天使3D》，她笑言翻看時最大感受是當年的她好年輕卜卜脆。提到當年有傳她被佘詩曼及郭羨妮孤立，她即說：「呢啲就唔講喇，搞到網上面啲人話我點解套套劇都話畀人蝦，係咪我有問題，但我唔會回應，其實我冇問題㗎，過去就由得佢過去，我唔再補充。」她又主動澄清演技差的問題：「我係憑《無名天使3D》呢部劇攞咗『飛躍進步女藝員』獎、女配角獎同國際獎項，唔好話我戲屎。」她透露不少內地劇集邀她演出。問到無綫可再找她拍劇？她揚言無任歡迎，並高呼愛「娘家」：「有人搵我即刻返娘家，我愛你呀。（可介意再同佘詩曼、郭羨妮、商天娥合作？）我唔介意。（同前度李泳豪合作呢？）我好welcome（歡迎），演員係要專業。」
祖藍多投資嘆銀根短缺
另外，思琦最近接受伍詠薇主持的清談節目時，講到拍劇時被前輩演員欺凌，她強調當日也是到場才知道訪問問題，自己不會刻意去講，認為不用再提。問她是否已經放下，她笑說：「我已經放低，（我）其中一個優點係冇記性，加上以前我跌傷個頭，記性更加唔好，唔開心嘅嘢最好唔記得。」對於網民推測她指的前輩是商天娥，她續說：「我唔需要講，已經講得太多，係唔係佢都唔會講。」可是，思琦卻就「孤寒」的傳聞解畫：「話我攞拜神燒肉返屋企，唔係我主動攞，係有人提議我攞，而且我只係攞過一次；又話我唔萬歲（請客），我係有萬歲，只係無人講；又話我連隔籬廠有人萬歲，我都走去攞，冇啲咁嘅事。」
同場的王祖藍表示現時擁有4台車，但由3個家庭輪流使用，所以尚算合理。他又坦言現時銀根短缺：「因有好多投資，為未來鋪路。」他透露正籌備開中菜館，第一間會在香港開，亦投資關於小朋友的影視作品，暑假推出。他坦言影視界工作愈來愈少，只好作多方面發展，並坦承曾志偉有跟他洽談電影事宜，問到是否開拍賀歲片？他否認：「據我所知，今年好多人做賀歲片，所以無謂去做，唔急，磨好劇本先。」他自嘲現時是「炒散」，什麼工作都做。
