《執法者們》揚威紐約電視電影節 黃宗澤冀港劇繼續發光發亮
香港文匯報訊（記者 阿祖）劇集《執法者們》揚威國際，榮獲「2026紐約電視電影節」中「串流犯罪劇集組別優異獎」，身為該劇男主角的黃宗澤（Bosco）今年攞獎運極旺，從年初得到雙料視帝後便不停攞獎，雖然感到好大壓力，但他仍然希望繼續攞落去，讓港劇發光發亮。
劇集男主角Bosco得悉《執法者們》能夠揚威海外得獎，感到特別開心：「始終呢套劇真係拍得好辛苦，大家有咁大量嘅打戲，又要去到咁遠嘅鑽油台拍外景，一大班工作人員一齊去捱過呢個拍攝，攞到個獎唔只我開心，我都戥攝影師、導演同所有工作人員開心呀。因為大家都真係搏咗條命去拍，雖然好多打戲好辛苦，咁嗰陣時梗係要呻辛苦啦，要向樂小姐（樂易玲）撒吓嬌嘛，拍得咁辛苦，𠵱家有咁好成績，上年收視咁好，𠵱家又攞到獎，真係乜都抵返晒啦。」
提到他今年攞獎運極旺，Bosco竟然有點擔心：「哎呀！真係好大壓力呀，之後都唔知攞唔攞到獎，哈哈，都係講笑啦，咁希望梗係拍多啲更好作品，拍多啲好戲啦，即係畀更多娛樂觀眾啦，攞更加多獎更加好啦！」Bosco一直以拍港劇為主，原來是對港劇有情意結：「我始終喺香港長大嘅，咁梗係拍港劇就最開心啦，因為真係港劇養大我嘛，如果可以同內地劇集或者電影方面有更多合作就更加好啦，因為都想學多啲唔同人唔同地方嘅拍攝方法或者佢哋嘅知識。」
榮耀歸功整個團隊
至於該劇女主角之一的蔡潔，對於劇集得獎感到十分興奮：「真係好榮幸呀，好興奮知道呢個得獎嘅消息，係一份屬於我哋成個團隊嘅榮耀，好多謝亦都好感恩。自《執法者們》播出以來一直都收穫咗好多觀眾朋友嘅喜愛，大家對於『何天茹』（蔡潔角色）同埋『周俊傑』（Bosco角色）呢段感情（菠菜CP）嘅追看，令到佢哋呢一段關係同故事更加圓滿，期待日後可以繼續做多啲好嘅作品送畀觀眾。」
另一位劇中女主角陳瀅，在戲中有大尺度演出，演技更令人眼前一亮，對於劇集得獎，她覺得十分開心，為台前幕後辛苦付出終有回報感到安慰。
