市面驚現$1磨砂假幣 圖案模糊光滑冇坑紋
近日香港市面驚現疑似1蚊假幣！有女網友發帖PO相憶述日前買餸收到兩個1蚊硬幣，事後細看始發現其中一個表面竟是「磨砂面」，側邊呈光滑狀，疑為假幣。網民大感震驚慨嘆「連1蚊都有假？」不少人懷疑假幣成本或高於1蚊，對造假動機難理解，部分人則推算可能是「錯版」或「入過乾衣機」所致。惟樓主翻查發現假1蚊新聞早於10年前已有報道，另往銀行查問亦獲職員回覆「覺得係假」，故籲大家多加留意。
樓主日前在Threads發帖寫道：「原來一蚊都可以係假」，並指「左邊嗰個係真，右邊嗰個好似磨砂面，啲細節唔清楚同埋側邊係光滑！」疑似假幣正面印上2017年份，但兩面中英文字及圖案皆模糊不清，側邊光滑沒坑紋，她還用磅秤過重量，發現假幣與真幣相差0.1至0.2克。樓主其後將假幣拿去銀行，幾名職員初步看後也覺是假，允作進一步檢驗。
同款假幣消息10年前曾見報
大批網友留言對「1蚊都有假」感到不解及不可思議，有人更鬧爆「1蚊都呃」、「練功券啲fd練功幣？」也有不少對「1蚊造假」有所保留，質疑「做個假1蚊成本會高過1蚊喎」、「造假唔會造一個，一造就幾十萬個，先發現得一個半個，可信性唔高」。部分網民則推敲硬幣變磨砂面的原因，「只是硬幣耗損，因為硬幣入過乾衣機之後所致」、「有可能只係有人貪玩磨」。
也有網友提到「2017年時都收到過，原來依家仲存在市面上！」「記得細個嗰陣有次買嘢，都收過咁嘅10蚊，輕好多」；更有網民上載疑似兩元假幣照，分享中伏經歷。而樓主也留言回應指，「新聞有話呢個係假㗎！！ 原來10年前已經有」，其後更附上新聞截圖，提醒大家日後找續時多加留意。
