新歌展現溫柔一面 黃洛妍霸氣僅為保護色
香港文匯報訊（記者 阿祖）黃洛妍（Janees）推出全新單曲《槍與玫瑰》，是一首關於和平訊息的歌曲，所以她收起平時大家見到的霸氣形象，取而代之以溫柔的聲線帶出溫暖與希望。拍攝MV當日，Janees抱病上陣，她說：「我病咗幾日，拍攝當日係最病，一路發高燒退唔到，又冇胃口，又瞓唔到覺，亦都要拍節目，但係唔可以因為我身體抱恙而拖累大家嘅進度，唔可以辜負團隊嘅心機。」她續說：「我好識得麻醉自己，同自己講『冇病呀，精神！must do！』」
新歌展示出Janees不同的面向，是溫柔而有力量的一面，她笑言：「平時形象嘅霸氣，只係我一部分，大家唔好被我個樣呃咗，我係要保護人嘅時候先會霸氣，其實認識我嘅人都知我平時好溫柔嘅，哈哈！」
新歌MV用一鏡到底的方式拍攝，呼應歌詞內容，Janees冰冷簡約的房間裏，如常地過生活，但從電視新聞得知世界各地發生的事，那種感慨、沉重沒有形於色，而是藏於心，百感交集。她說：「拍攝過程其實好感觸，同我每日睇到新聞嘅感受一樣，成日都會問『點解會發生呢？點解今時今日仲未停呢？』」亦正是這份感觸成為她的靈感，與作曲人及監製譚國政去討論創作方向，並由林若寧去填詞，她說：「成個過程大家互相好明白，收到第一版歌詞就已經係Yes，想表達呢件事。」
Janees感慨道：「其實我哋真係好幸運，有安穩嘅生活；身處遠方有好多小朋友流離失所，為咗生存好多嘢冇得揀。雖然未必可以幫到好大忙，但希望喚起大家關注，同時可以將和平、愛傳開去。」
