檔主下「爆旋陀螺」戰書 勝者送豬肉掀集體回憶
千禧年代前後曾風靡全港的經典玩具「爆旋陀螺」近期翻hit，只要經過公園等空曠地方，不難見到大人細路圍住陀螺盤比拚。正當這久違的熱血對決捲土重來之際，元朗同益街市一位「爆肌」豬肉檔主趁機推波助瀾，日前在社交平台寫下戰帖，邀請大家到其檔口切磋，勝出者可贏取豬骨或瘦肉作獎勵，吸引大批網友興奮留言分享集體回憶。
近日元朗同益街市有年輕豬肉檔主在Threads上載短片及相片，樓主自稱「元朗區嘅豬肉陀螺戰士」，更公開向網友發出對戰邀請：「歡迎過嚟搵我對戰，贏咗我請你食少少豬骨or瘦肉」。短片可見擁有粗壯「麒麟臂」的樓主正手起刀落斬豬肉，相片則晒冷展示其18個爆旋陀螺和陀螺盤的超強裝備。帖文短短一天已收穫逾40萬次瀏覽。
網友笑問鬥贏可否拎柳梅
網民對引戰提議一致讚好並雀躍回饋：「師兄，贏咗可唔可以拎你1條柳梅」，有網民更好奇問道：「之後會唔會有賣魚盛、菠菜蓮參戰㗎，到時候街市變對戰戰場」。
不過礙於樓主身形魁梧兼架生齊備，網友大多認為即使赴會也勝算不高，「呢位Ching做唔到陀螺戰士就會去做健身教練」、「請問一下你練咗幾多年先有咁嘅成果？」，甚至笑問「今日有幾多個小朋友喊？」但亦有自視甚高的網友無懼樓主氣燄留言挑機：「搵日帶埋架生同你隻抽，我贏，你擺低豬肉，你贏，我擺低卡包（卡牌）」獲樓主爽快回話：「來，要爆卡」。
此外不少網民就發揮幽默本色大開玩笑，「應承我，你輸咗唔可以拎刀出嚟」、「贏咗你有豬肉拎，咁輸咗呢？輸咗嗰啲人係咪變成咗豬肉？」獲樓主回答「掛晒上架」，十分「嚇鬼」。
