公園深宵大聲播鹹片 天秀街童勁滋擾捱轟
天水圍天秀路公園周日（26日）凌晨疑有街童大聲播放淫褻影片，陣陣女子呻吟聲不但響遍公園，亦對街坊造成滋擾。有女網民與涉事單車少年爭拗，僅獲回覆「唔關我事」，遂將過程拍下上傳社交平台Threads並報警處理。警方證實周日約零時51分接獲一名女子報案，警員接報到上址調查，但涉事人士經已離去。
樓主在帖文憶述當晚放狗經過隱約聽到奇怪聲，開Cam查看發現一班街童正踩住電動單車開大喇叭播鹹片！「我哋過去之後，一個返轉頭車埋女朋友，另外兩個即閃，再寸番我哋話自己好✕型。隔籬樓上啲人都已經瘋狂✕。」樓主指已即刻報警，現呼籲網民幫眼認人，「有冇人識佢哋，麻煩話埋畀佢哋屋企人同學校知佢哋有幾型呀唔該」。
不少網民鬧爆街童行為嚴重影響社區安寧，「天秀街童好✕癲……」「凌晨成日都X叫，一係就開大音樂，住最高都俾佢嘈死，低層仲慘」，有網民則慶幸說：「終於俾人影上Threads，日日嘈喧巴閉」足證確實神憎鬼厭。
