阿仙奴爭霸失優勢
關鍵大戰不敵曼城
英超昨晨上演爭霸關鍵戰，「藍月亮」曼城主場2:1勇挫「兵工廠」阿仙奴。今場比賽後，曼城雖繼續留守聯賽榜次席，但已追至僅落後阿仙奴3分並少賽1場，雙方失分已經相同。今屆英超爭冠戲碼，隨時要鬥到最後一輪比賽才能分出勝負。
曼城此役非勝不可，憑主場之利開賽即搶攻，卓基於16分鐘右路發難，連過數關後妙射得手先開紀錄。「兵工廠」僅兩分鐘後便把握曼城門將當拿隆馬犯錯，由夏維斯扳平。然而，曼城在今場比賽始終是表現較佳一方，65分鐘，夏蘭特接應尼高奧萊利傳送近射建功，終助「藍月亮」全取3分。
雖然球隊氣勢如虹，但曼城主帥哥迪奧拿賽後依然小心翼翼：「今場贏波並唔代表啲乜嘢，因為阿仙奴依然排緊榜首，得失球差亦領先緊，我哋目前可以做嘅，只係踢好餘下比賽。」至於阿仙奴主帥阿迪達賽後承認，球隊之前建立起的優勢已被耗光，但仍對自己的球員充滿信心：「聯賽形勢的確已變番均等，曼城經過今場勝利後信心亦會進一步增強，但我依然相信我嘅球員，我知道佢哋有幾強同幾渴望奪冠，我肯定大家都唔會放棄！」
根據目前形勢，曼城在香港時間周四凌晨的補賽只要作客擊敗排尾二的般尼，便可在分數上追平，而由於阿仙奴目前得失球差為「+37」（入63球失23球），只領先「+36」（入65球失29球）的曼城1球，入球較多的後者周四凌晨以任何比數擊敗般尼，也可立即登上榜首。
曼城冠軍落飛至1.68倍
在曼城完成對般尼比賽後，雙方便會同樣只餘下5輪賽事。阿仙奴餘下賽程似乎較容易應付，當中有3仗主場比賽（紐卡素、富咸、般尼），另會作客韋斯咸和水晶宮，從牌面計，5場比賽中只有對紐卡素以及兩場客場賽事較有難度。至於曼城餘下同樣有3場主場比賽（賓福特、阿士東維拉、水晶宮），另要作客愛華頓及般尼茅夫，從排名計難度較高，但阿仙奴要分心歐聯兩回合對馬體會的準決賽。足智彩的英超冠軍賠率，曼城已落飛至1.68倍大熱，阿仙奴則為2.05倍次熱，排第3熱門的曼聯，比阿仙奴多失12分，列為2,000倍大冷門，爭霸機會只剩數字上可能。
