PSG拔頭籌 展現衛冕底氣
利物浦射門零中目標
歐聯八強首回合賽事，巴黎聖日耳門（PSG）及馬德里體育會昨晨先拔頭籌，同樣以2:0分別擊敗利物浦及巴塞隆拿。PSG在主場展現力爭衛冕的決心及底氣，令到訪的紅軍全場無一中目標埋門，連利物浦主帥史洛亦坦承，今場只輸兩球已經非常「夠運」。
利物浦今場變陣出擊以3中堅陣式迎戰，不過面強大的PSG鋒線卻未有太大效果，主隊早於11分鐘已憑杜爾窄角度起腳施射，省中對手笠入領先1:0；換邊後PSG再有收穫，翼鋒基華拉斯基利亞左路一次個人表演，推過門將後冷靜射入，助PSG首回合以2:0佔得先機。
PSG今場佔據壓倒性優勢，若非利物浦門將馬馬達舒維利有上佳演出，PSG今場絕不只入兩球，相反收起沙拿的利物浦今場進攻乏善可陳，控球率只得26%，甚至一記中目標埋門亦欠奉，輸波在情理之中。
利物浦主帥史洛雖然強調未認輸，但坦承今場完全被PSG技術性擊倒：「今場我哋輸兩粒已經好好彩，PSG速度快，整體實力亦好出色！第一個失波令人難受，依家仲維持到晉級機會已經好好，我哋喺晏菲路主場可以發揮出強大實力，我哋唔會放棄反撲！」
巴塞落敗 主帥轟球證
紅軍中堅干拿迪在下半場一次禁區內阻截薩伊安美爾埋門，先被判罰12碼，其後被推翻。隊長雲迪克說聲言那是清脆攔截，但直言PSG非常難應付：「佢哋勤於跑動，好似無處不在！我哋一直需要等機會，但願次回合返到晏菲路表現會有好大唔同，我哋需要大幅進步，尤其控球方面。」
至於主場出擊的巴塞隆拿面對馬體會，上半場尾段有19歲古巴斯領紅被逐，馬體會前鋒艾華利斯把握機會射入罰球領先。換邊後馬體會阿歷山大索洛夫再入一球，幫助客軍以2:0勝出，亦是球隊自2006年後，首度於魯營球場贏波。巴塞主帥費歷克賽後怒轟球證執法不公：「一面紅牌改變咗比賽，球證嘅決定令人難以理解，尤其係VAR對馬體會非常偏袒！不過今仗雖然輸咗，我仍然相信我哋有逆轉嘅能力，仲有希望力爭晉級！」
