墳場老鼠偷祭品斷正 清潔姐影相搜證夠醒目
清明前後大批孝子賢孫攜祭品前往掃墓，但近日有網民在Threads發帖透露拜山巧遇「墳場老鼠」，一名中年大嬸被清潔姐姐揭發偷走大袋生果祭品，大嬸否認盜竊辯稱「諗住唔好嘥㗎咋。我第一次嚟。」卻遭清潔姐姐踢爆「我跟住你尾好耐，影晒相。睇你咁熟手一定唔係第一次。」帖文吸引不少網民留言，有人慨嘆：「一直以為啲先人食完再畀啲浪浪（流浪貓狗）食，估唔到有人偷」。
樓主憶述涉事大嬸「係咁拎人哋拜完之後放喺度嘅生果」後當場「斷正」，最終卻獲放生，「最後個負責人請示咗個上司放過咗佢」。惟樓主仍大讚清潔姐姐醒目，「識得唔打草驚蛇影埋相有證據斷正。」
網民對有「墳場老鼠」偷生果感驚訝，「偷完唔覺佢會食，覺得佢會拎去擺地攤賣畀人」有人直言「呢啲報警，警察實做嘅，不過為咗個蘋果就好無謂，就算官判刑都係好輕，呢啲人自然會有先人問佢追番個蘋果㗎啦」有理性網民則建議：「拜完之後自己執番啲祭品啦，食物係畀人食嘅，一係就畀真老鼠食，唔係畀鬼食嘅 」
