邊傾電話邊搣腳皮 女乘客機上缺德捱轟
乘公共交通工具理應要保持地方清潔，但有女乘客日前搭飛機時卻公然除鞋盤膝而坐，再忘我地狂搣腳皮，過程被人於社交平台發帖公開，相關內容再被多次轉發引發熱議。大批網民痛斥女乘客缺德，弄至通地腳皮「骯髒」兼「嘔心」，更擔心其患有香港腳恐會傳染真菌。該女乘客甚至被嘲諷「瞬間變網紅」，足見醜事可以傳千里。
有網民日前於Threads分享相關影片及相片，並留言道：「刮腳皮刮足全程機，仲要有聲的，睇嚟啲皮好硬」。片中所見一名年輕女乘客疑在等候客機起飛前，已在座位擺好陣勢，脫鞋赤腳盤膝而坐，一邊用手機傾談，一邊則用手猛搣腳趾的腳皮。帖文上載後引來大批網友發表意見，「睇到想嘔」、「好唔衞生」、「刮完腳仲要聞手，嘩，重口味到呢」、「佢自己真係唔覺得有問題」。
滿地腳皮 質疑患香港腳播菌
其後有男網友自爆當時亦在機上，並上載女乘客的其他「罪證」，相片可見座位之下一地疑似皮屑，網民鬧爆「可以有咁多皮，真係恐怖」、「係咪有香港腳？真菌感染呀」、「誰坐過她的位置誰倒霉」，有人更直言在飛機遇上這種乘客「真係好慘」，「出聲叫佢唔好整又驚對方發癲，唔出聲又要忍足成程機」。
多位網友還關心地問：「救命！你點頂到佢全程？好嘔心呀，你無出聲叫佢注意下公共衞生？真係辛苦晒」、「到底你有冇同空姐投訴過佢或者要求換位啊？」「你好勁頂得順」有網民則獻上怪招作對應：「佢走嗰陣有冇叫住佢？小姐你漏低咗好多嘢」「呢啲X佢無用，除鞋同佢一齊搣，或者起身對住佢放幾個響屁慢慢玩」非常搞笑。
