煙民港鐵站嘆住煙撳錢 行為自私遭圍插
再有煙民被發現在港鐵站內公然吸煙！有網民日前在社交平台Threads上載短片分享奇遇，透露途經港鐵柯士甸站，赫然發現一名男子竟在站內滙豐銀行櫃員機「一路撳機一路食煙」，「仲瘋狂周圍望，驚死人捉佢食煙」，而更離譜是該男子竟將旁邊的垃圾桶當作煙灰缸用，已即時通知港鐵職員跟進。帖文吸引大批網民留言狂鬧，質疑當事人「食少陣會死？」並讚揚樓主通知職員做法正確。
網民普遍對有煙民在港鐵範圍吸煙反應激動：「大癲」「黐X線」「公然挑戰香港法律」「好自私呢啲人」「是不是覺得自己很帥啊？」有嬲爆網民甚至發晦氣說：「不如吸毒啦，一支煙時間都等唔到，用鼻索啦，快啲上頭」。
抱怨禁煙不力 只顧閘口「查飛」
不少網民抱怨港鐵禁煙不力，揶揄只顧安排職員在入閘位置「查飛」，有人更投訴「成個柯士甸站都長期煙臭除」；有網友就乘機獻計：「應該出告票即場罰錢，罰嘅錢歸捉嗰位職員，咁就一定落力捉」盡顯破格的想像力。
