炒熱刺止血 阿仙奴保優勢
利物浦補時絕殺森林
昨晨英超「北倫敦打吡」，阿仙奴作客4:1大炒熱刺，成功終止兩場聯賽不勝的頹勢。「兵工廠」全取3分後，在榜首以28戰得61分，領先次席曼城5分，雖然曼城踢少一場，但阿仙奴總算保住優勢，並將爭霸主動權掌握自己手中。
阿仙奴對上兩場英超僅和賓福特和狼隊，重演近年季尾「自爆」劇本。今場作客有新帥杜陀上任熱刺，一眾球員顯得十分醒神，32分鐘布卡約沙卡右路傳中，伊比爾治伊斯雖然第一下控高，但隨即半車身抽入，惟兩分鐘後，阿仙奴因防守犯錯，被主隊法國前鋒高路梅安尼追成1:1平手。換邊後阿仙奴馬上調整，約基利斯47分鐘禁區頂無人看管下射入，熱刺想搶攻卻導致後防有更多空位，61分鐘沙卡射門被救出，伊斯補射拉開至3:1。補時階段約基利斯接應馬田奧迪加特傳送，殺入禁區射入個人今場第2球，協助阿仙奴以4:1大勝。
「兵工廠」領隊阿迪達賽後表示早已知道球員擁有永不放棄精神：「上場對狼隊失分係好難解釋，當時就好似世界末日！不過我睇到球員嘅反應，就知道佢哋有決心作出改變。如果佢哋只視踢波為工作，就唔會有今場嘅激情，因為佢哋真正熱愛足球！」從水晶宮加盟嘅伊斯，今季雖然並非阿仙奴主力，但卻成為熱刺殺手，首循環在對手身上攻入3球，今場再入多兩球，全季6個英超入波，有5球都在熱刺身上取得。伊斯指：「我對每一隊都想入波，只係面對熱刺腳風卻特別順啫！」至於熱刺新帥杜陀出師不利，賽後毫無掩飾地批評球隊過去有太多「壞習慣」，必須盡快調整及反省。
史洛：紅軍唔值得贏
衛冕冠軍利物浦憑麥亞里士打補時7分鐘於門前執雞射入，以1:0絕殺諾定咸森林。紅軍現時與車路士及踢少一場的曼聯同分，領隊史洛承認今場能夠贏波而回有運氣：「上半場係我執教利物浦以來最差表現，好在下半場改善咗好多。呢場波和波比較公平，我哋唔值得贏！不過之前我哋有好多場踢得好嘅比賽，都好唔公平咁失咗分，今場就當係補償啦！」
