麵店年初五仍加三 網民怒斥好過去搶
新正頭市面不少店舖關門休息，但仍有不少食肆照常開工，並按行內不成文慣例於大年初一至初三紅日假期收取「加二」甚至「加三」附加費，以彌補額外薪金開支。不過有港男於年初五（21日）幫襯銅鑼灣一間麵店時，落單後始發現仍需收取加三服務費，埋單計一碗牛筋腩河、一碟生菜加凍檸茶盛惠105元，不少網民都狠批麵店離譜，鬧爆「好過去搶」！
樓主日前於社交平台Threads發帖，分享在年初五光顧銅鑼灣一間麵店的激氣遭遇，抱怨指「嗌咗嘢食先知原來要加三。冇睇到個牌」，並附上單據為證。單據顯示樓主點了牛筋腩河（55元）、生菜（15元）及手寫單（凍飲11元），合計81元，但由於加三服務費，24.3元額外費用就在「恭喜發財 萬事如意 新春加收服務費」一欄顯示，總計為105元。
樓主其後留言解釋，單據上所寫的「手寫單」，其實是凍檸茶，並指「雖然食牛腩麵（河）如果要加一都離晒譜。而家+3又唔多人食。都唔知為乜。」樓主指結賬後麵店竟還叫他到「大眾點評」打卡，直言心情「諗起都躁」。
上班日照收不合理 一定無下次
網民紛紛對麵店年初五仍收加三服務費表達不滿，「今日（年初五）都仲要加三咁癲！」「初五都仲加三真係有啲誇張」。有網民直言年初四已是上班日，仍收服務費不太合理，「初四五唔係請咗假就要返工喇，過分」，不諱言「初一到初三要加三好合理，初五都加三就一定無下次」。
亦有網民分享同一天光顧該麵店的單據，附圖顯示被收取94.5元加三服務費，笑言：「師兄咁啱呀，同一間喎！」惟亦有理性的網民提到，「你可以選擇唔食、你自己沒有問清楚幫襯是你的責任」；有人則建議「新年呢啲時間都係去番大集團快餐算」，這樣就無需為了被濫收服務費而煩惱。
