港隊無緣台盃世界一組
黃澤林領軍 力戰負芬蘭
台維斯盃世界一組附加賽昨日假維園網球場舉行次日賽事，首日與芬蘭打成1:1的港隊，昨日先有鄭肇致夥拍黃澤林出戰雙打，以直落兩盤不敵維坦倫/尼拉斯沙明倫。黃澤林（Coleman）其後在單打又以盤數0:2吞敗，最終港隊以場數1:3不敵芬蘭，無緣晉身世界一組。
鄭肇致/黃澤林的港隊男雙組合，在第7局被對手破發，先輸一盤4:6。去到第2盤雙方初段都互保發球局，直到第11局鄭肇致/黃澤林遭破發，以5:7吞敗。黃澤林緊接登場出戰單打對維坦倫，Coleman首盤於第9局被破發，雖然及後破發回敬，但仍以5:7落敗。去到第2盤黃澤林兩度被破發，落後局數0:4，黃澤林及後無力反撲，以2:6落敗。港隊總場數輸1:3。
黃澤林昨日先夥拍鄭肇致出戰雙打比賽，及後再出戰男單，他坦言對體力一定有影響，但參賽前已經預料會出現這個情況：「今日單打對手發揮得比我好，呢個唔係水平問題，分野在於關鍵分數處理，有啲地方我其實唔應該冒風險去打。今次係打完雙打即刻再戰單打，令我唔能夠保持穩定表現。」
另外，芬蘭隊昨日臨時變陣，改派維坦倫與尼拉斯沙明倫出戰雙打，黃澤林笑稱對方作出變動，證明港隊能夠給他們帶來威脅，「感覺對方重視我哋，怕唔夠我哋打，所以至要換拍檔，我哋應該因而更有自信，人哋可能仲驚過你呢！」黃澤林當年以15歲之齡成為港隊史上最年輕台維斯盃代表，來到2026年他則以「大師兄」身份領軍出戰，「隊友已經唔同咗，要時間適應，不過我哋相處得好好，默契都好好，大家都睇到我哋今場雙打，同對手有來有往，唔係冇得打。」
讚17歲拍檔鄭肇致進步
至於17歲新星鄭肇致周六上演台維斯盃主場「處子戰」，此子無論在受訪或比賽時均表現得十分緊張，來到次日比賽鄭肇致認為自己心態已有所改善：「我唔係一個外向嘅人，打雙打需要有拍檔提醒我，台維斯盃係個好體驗，會繼續努力。」而黃澤林亦認為「師弟」有進步：「你見佢好享受每一球，每一個接發。佢一直豁出去打，我哋更積極互動，我覺得今次比賽一定可以幫到佢唔少。」
