買啱施美安 曼城半隻腳闖決賽
昨晨英聯盃準決賽首回合，曼城作客2:0淨勝紐卡素。「喜鵲」上半場初段憑主場氣勢佔得上風，但多次錯失良機。大難不死的曼城下半場開始控制戰局，53分鐘，謝利美杜古左路傳中予施美安近門先開紀錄，這位從般尼茅夫加盟的翼鋒繼上場英足盃「地標戰」後再取得入球。比賽到補時階段，曼城再憑卓基埋齋贏2:0，帶着兩球優勢迎接在香港時間2月5日凌晨舉行的次回合賽事，屆時「藍月亮」還將有主場之利，堪稱半隻腳踏進決賽。
曼城領隊哥迪奧拿賽後對施美安讚不絕口：「施美安同夏蘭特喺下半場逐漸取得默契，我要多謝般尼茅夫，佢哋將施美安調教得好出色，令佢識得喺適合位置出現。」施美安賽後則直言對新東家十分滿意：「曼城所有球員都具備良好能力，而且依然希望尋求進步，我喺呢度感覺好輕鬆，正在享受每一個時刻。」另一方面，紐卡素主帥賀維則拒絕認輸：「我哋上屆準決賽首回合都曾經兩球領先，當時感覺唔算隱陣，因為次回合落後一方如果早啲入波先，就會出現轉機。」
