留力生死戰 科隆做順水「仁」情
周四凌晨德甲繼續開快車，班霸拜仁慕尼黑作客對第11位科隆。科隆上輪作客賽和降班膽海登咸，已經累計7輪不勝，教頭哥斯尼奧克面臨極大壓力，據報在未來兩輪主場賽事，分別對拜仁同緬恩斯，如果未能重返勝軌，將極有可能被炒。權衡輕重，既然今仗贏面極低，不如留力周末主場對包尾弱旅好過。狀態火熱的拜仁讓到兩球，依然要撐上盤。（NOW 639台周四3:30am直播）
科隆開季表現及成績都不俗，可惜踏入10月中後諸事不順，尤其主場對奧格斯堡及聖保利等弱旅都未能贏波，哥斯尼奧克不斷受到球迷攻擊。周末對緬恩斯變成生死戰，今仗若然早落後發現事不可為，隨時會收起主力有所保留，何況今仗更面對嚴重傷停問題，包括最強中場德國小國腳艾歷馬提爾停賽，戰力下滑；拜仁剛戰大炒禾夫斯堡8:1，至今16戰已入63球，正全力挑戰自己於1972年創下的101球單季最高入球紀錄，今仗領先後亦不會保留，再大勝一仗絕非難事。
