喝蔡少芬收聲 朱茵拍劇出真火
《風華背後》煞科宴群星出席
邵氏與內地平台共同合拍的重頭劇《風華背後》陣容鼎盛，邀得汪明荃、蔡少芬、朱茵、黃宗澤（Bosco）、姜大衛等人演出，一眾演員前晚（7日）出席劇集煞科宴，蔡少芬指與閨蜜朱茵首度合作拍劇，扮演豪門姊妹，4個月拍攝以來相當順𣈱合拍，默契十足，不過朱茵坦言想搭訕找人傾偈有困難，「我哋雞啄唔斷，工作人員都怕咗我哋！」
蔡少芬指劇中的姊妹情相當有戲，感情有起伏，相當寫實，朱茵認同說：「現實都係咁，唔會日日糖黐豆，好似人生咁總會有起跌，可以放落戲入面，對我哋感情、對戲嘅火花，都係一個進階。」
問到可會拍攝得太入戲動真火﹖蔡少芬說：「有場戲，佢無啦啦好大聲咁講，你唔好講嘢住，等我做埋先。我就話OK，你做埋先啦，兩個人就唔講嘢做埋場戲，完咗佢就同我講對唔住，唔好意思。我就話冇嘢，你係咁，好兩姊妺囉真係，過咗就算，雖然我放咗喺心度，哈哈。」朱茵則解釋說：「你又唔講開頭，蔡小姐話你應該咁做、咁做，我就話你畀我做咗先啦，呢樣嘢真係好真，我哋兩個熟到咁，先會唔介意佢會嬲。」
黃宗澤串阿Bob整爛獎座
出爐視帝的Bosco亦在現場接受大家祝賀，大會特別準備了「最佳男主角」獎項大蛋糕為Bosco慶祝，當搬出蛋糕餅時，Bosco更出手「護獎」並笑說：「小心，唔好好似阿Bob咁。」明串阿Bob日前意外扑爆「最佳男主持」獎座。
