大火災民租樓被拒 業主諷唔吉利捱轟
宏福苑五級火發生逾一個月，災民長遠安置計劃暫未有定案，不少災民為方便工作或遷就子女上學，寧選擇在同區租樓解決短期住屋需要，由於需求增加，區內租金升幅顯著，勞福局副局長何啟明日前亦呼籲大埔區業主勿坐地起價倡用市值租金放租，亦側面反映區內業主大有揀客本錢。言猶在耳，有災民近日在Threads發帖，指近日睇樓竟遇業主刁難：「我唔想租畀你哋，因為你哋唔吉利」，災民指雖非親身聽到，但直言「真係難聽過粗口！」不明為何要受二次傷害，痛極下反問：「究竟要幾涼薄先會講出啲咁嘅說話？」帖文引來大批網民留言安慰支持，鬧爆業主「佢心腸咁差，肯租都唔好住佢間屋」。
樓主其後在回應補充說，自大火後每日生活並不容易，家人更不時會自責，「依家仲要為一個臨時居所而煩惱，實在承受唔到更多」，他坦言「選擇分享，並非為了公審，只係心痛家人嘅經歷，更唔希望有街坊會經歷相同情況」。
不少網民留言支持樓主，有人安慰道：「其實這個世界真係有好多這樣涼薄自私的人。希望你可以早日收拾心情，香港仍然有好多人願意伸出援手的。」更多網民不齒業主惡行大鬧「黐線㗎？咩業主嚟㗎？！」「唔租咪唔租囉，都唔使咁講嘢嘅」、「祝佢租咗畀個極品租霸」等，不少人要求樓主公開租盤資料，想「曲線」為業主宣傳一下。不過也有網民持不同意見，「無人話租（畀）你一定要同情你，亦冇人規定業主一定要遷就你感受」。
樓主：希望大家可以多啲體諒多啲愛
樓主回應時不忘多謝網民關心，亦提到明白自由市場業主有選擇租客權利，想搵到最合適的租客亦無可厚非，但強調「拒絕都有好多種方法」。他最後誠心說：「希望大家可以多啲體諒、多啲愛」，並祝大家新一年都能夠平安。
