曾比特變身型男 操肌一年減30磅
加盟英皇最想跟霆鋒學廚
曾比特（Mike）日前在32歲生日當天，於社交平台大晒苦練而成的六塊腹肌照，引來全城熱議，並同時宣布正式加盟英皇娛樂，展開事業新篇章。曾比特前晚（12日）現身中環出席祝捷會時，談到加入英皇後希望跟同門師兄、師姐多合作，但最想竟然是跟謝霆鋒學廚，「我廚藝麻麻，最叻只係煮公仔麵。」
曾比特一向以爆炸頭為標誌，2019年參加《全民造星II》出道時，形象較為老實，甚至被形容為「肥仔波」。然而，近年他轉戰內地發展，憑藉《聲生不息》及《披荊斬棘》等節目累積人氣，同時也開始認真健身。這次生日照中，他身穿白色背心，手臂粗壯、肩膀線條明顯，腹肌粒粒分明，被網民大讚肌肉男神。
曾比特回應傳媒訪問時承認瘦了很多，指參賽時最高峰180磅，減到現在147磅，「其實有咁嘅身形，自己都用咗一年嘅時間去操，同埋嗰張相我係無預警嘅，因為當時影嘅時候，係冇諗住影腹肌，係突然間攝影師問我有冇腹肌，我就話應該有啩，就畀佢哋，在場嘅同事就話影啦，跟住先至有呢張相出現。」
每日健身兩個鐘嚴控飲食
提到要擁有這健美身形，曾比特直言戒糖控制飲食：「我依家日日都健身兩個鐘，飲食都要清淡啲，每餐都要食雞肉，同埋我好耐冇食甜嘢，只係喺我生日嘅時候食咗個蛋糕之後就冇，咁都好滿足，始終開始玩健身，都真係對糖冇咁大需要。」
