舒淇初執導電影 馮德倫秘密現身
奪釜山影展最佳導演承認幸運
現年49歲的舒淇推出首部執導電影《女孩》前晚（4日）在香港舉行首映，舒淇早前憑電影在《第30屆釜山國際影展》贏得「最佳導演獎」，她坦言信心一直都有，但獲獎就要看天時地利人和，「好幸運囉！」首映禮上，丈夫馮德倫雖然沒有現身，但事後就有欣賞電影，並跟舒淇在首映台前合照。
舒淇在接受傳媒訪問時表示，來到香港站是最輕鬆的一站︰「之前已經走咗兩個幾月，應該緊張嘅都緊張完，應該流眼淚嘅又流完，就係你哋會比較唔輕鬆，因為要聽我講廣東話，我練咗好耐喇！」
故事取材兒時家暴經歷
《女孩》的故事，部分是取材舒淇兒時受家暴的經歷，這些往事都有略略跟馮德倫提過︰「佢有時同我返台灣，會覺得我同阿爸講嘢時好粗魯，我會同佢講『你都唔知細個時我老竇點對我，我依家咁樣同佢講嘢已經好好㗎喇！』跟住佢就唔想同我講嘢，不過當佢睇完呢部戲時，佢就話可以感受到我細個時候嘅環境嘞！」
電影於今日（6日）香港正式上映，舒淇稱擔心電影會叫好不叫座︰「怕會影響之後想再拍戲的機會，資金會冇咁多，難再有相同質素嘅戲，最緊要唔好令投資方蝕錢。」至於拍攝時有沒有打算自資幫補製作費？「監製阻止我，佢話新人第一次拍戲，雖然你係舒淇，但都唔好自己拎錢出嚟拍戲，要堅持製作電影的原則，唔好有壞影響，其實有很多場我都想重新拍過，但監製說電影就係一種遺憾的藝術。」
