哈利卡尼準備好捧世界盃！
32歲登生涯最高峰
英格蘭國腳哈利卡尼，年屆32歲至踏入職業生涯最高峰，開季至今帶領德甲拜仁慕尼黑所向披靡領導群雄，亦協助英格蘭國家隊橫掃世盃外，提早出線決賽周！卡尼承認現時無論生理同心理狀態都前所未有咁強，今季有信心挑戰一切獎盃，甚至感覺已到時候，在明年7月幫助英格蘭在美國高舉世界盃！
卡尼在開季至今，代表拜仁及英格蘭合共出賽14場，已經取得22個入球！同期全歐洲只有曼城夏蘭特比他多一球。卡尼在接受《每日郵報》專訪時深情表白：「我嘅狀態比過去任何時候都要好！除咗身體狀況一流外，依家我處於擁有豐富經驗嘅年齡，心理上亦完全成熟！我好興奮，無論喺拜仁定英格蘭，我嘅球隊都可以創造好多機會，我對自己的把握能力亦好滿意，所以每次落場都有信心入波！」
對於自己在現階段仍然不斷進步，他歸功於拜仁教頭高柏尼：「幾乎每支球隊對住拜仁都會採取深度防守，我嚟到慕尼黑嘅第一季雖然都入好多波，但結果攞唔到錦標。不過經過同教練經常交流，我會更多時間回撤禁區外攞波，然後同隊友作第一時間配合，減少自己強行突破！無論表現同數據，大家都見到進步成效！依家我經常兼顧埋策劃工作，但又唔影響入球效率同數字！」對於今季在拜仁的目標，他坦言要挑戰一切錦標：「上季我哋喺盃賽表現唔好，但依家大家都更有信心，尤其歐聯戰線提升成績！我哋都有決心挑戰三冠王殊榮！」
酷熱比賽知道點適應
除了拜仁，卡尼明言在明夏將世界盃帶返英格蘭，是他的生涯終極目標，而且有信心可以實現：「我覺得係時候啦！英格蘭目前陣容好強，我哋已經兩度打入大賽決賽，雖然輸波，但已經累積咗足夠經驗！杜曹執教對我哋嚟講係好事，佢擁有盃賽成功經驗，對我哋會好有幫助！」卡尼更表示拜仁在今夏的世冠盃經驗，更增添他在明夏世盃決賽周交出好表現的底氣：「我哋喺美國經歷艱難時刻，喺酷熱天氣下中午比賽，嗰種滋味之前未試過，但試過之後，我知道我會點樣去適應！」卡尼甚至對未來金球獎有憧憬，他在過去兩季都成為德甲神射手，並贏得德甲冠軍，但金球獎只獲第13名，但卡尼相信，只要今季每方面都持續取得更好成績，個人榮譽自然會來！
