游游操弗 火辣警報
誓搣「A0女神」稱號 無懼性感演出
現年25歲的游嘉欣（游游），於早前播出的劇集《俠醫》中飾演腦癱的追夢少女周靜芝，因為腦癱影響左手活動，全劇要坐在電動輪椅上演戲，對首次演行動不便的角來可謂甚有難度，而其演出亦獲觀眾好評。游游誓要搣甩「A0女神」稱號，日後拍拖亦不打算公開，修身有成的她無懼性感演出。文：梁靜儀 攝：北山彥
2018年出道的游游，出道以來備受力捧，曾參演《香港愛情故事》《青春不要臉》《你好，我的大夫》及《羅密歐與祝英台》等多齣受歡迎劇集，形象一向清純的她，近日一改密實作風，在社交平台分享緊身運動服及性感比基尼泳裝照，大騷美好身段，原來背後大有苦衷。
臉圓圓帶點Baby Fat，因監製一句話而開行turbo減肥，游游自嘲本身是「穿衣顯肥，脫衣顯瘦」的人：「可能大家唔係好相信，因為我喺鏡頭前成日都係好腫，其實我本身係『瘦底』，我以前瘦到成條柴咁，入行後我塊面都好圓潤，外人一睇就以為我好肥，好多監製都會話我需要減肥，為了視覺效果好睇，就好努力push自己運動。」
極端方法減肥 身體響起警號
真人一點也不算肥的游游，為了上鏡好看，曾用一年時間去拳館操練打拳，又會穿上長衫長褲跑步跳繩焗汗，她回憶當時又會以極端方法減肥：「我會做過量運動，仲要係營養不足下做運動，試過一日只食隻香蕉、幾隻蛋或雞胸就算，仲要維持咗一兩個月，我以為足夠，有時拍劇放飯，我只食幾條菜就算，又戒埋消夜，都試過餓到踎低起身見頭暈。」消耗比吸收多，加上壓力，結果影響到女性周期，結果要食藥調理，也因此而出水腫。
身體響起警號，游游終於醒覺到有時做得太盡，反而適得其反，她笑說：「有時見到其他女藝人又高又瘦，真係好難比，不過人比人，比死人，我又冇考慮去微調，反而多謝父母畀我呢個皮囊。」自言屬於運動型的游游，現在反而會追求肌肉及線條美，又認為只要付出過努力，不用太在意別人的批評，健康才是最重要的。
以往多是演可愛鄰家女孩角色的游游，回復健美身形後，直言可接受少許性感演出，若劇情需要，也不介意泳裝上陣，比基尼都可以接受，但前提是要身材夠弗，對於目前的身材，她給自己80分，認為可以再弗一點。
對於被網民推舉參加《女神配對計劃》新一季，游游認為節目節奏太快，很難認真去了解一個人，加上她有選擇困難，若同時有幾個追求者會覺得很辛苦，希望能在完善了解後給對方一個回應，加上對着鏡頭，始終有個「濾鏡」，所以不考慮參加。
