普斯迪高古仲未開齋
安東尼 搞寸森林回歸派對
歐霸盃昨晨上演多場聯賽階段首輪賽事，當中西甲貝迪斯於焦點戰憑巴西翼鋒安東尼於85分鐘建功，主場2:2賽和英超諾定咸森林，搞寸後者闊別30年後回歸歐洲賽慶典，亦阻止了森林新帥普斯迪高古迎來領軍後首捷！
今夏苦等至轉會窗關閉前才獲曼聯放人重返貝迪斯的安東尼，開賽僅15分鐘便助攻予巴卡保先開紀錄。然而落後的諾定咸森林之後發起反擊，並由伊戈捷西斯個人梅開二度反超前2:1。眼看勝利在望之際，安東尼在85分鐘替主隊建功，2:2逼和森林。獲選賽事最佳球員的安東尼賽後表示：「我冇參加到球隊季前熱身賽同操練，今季喺貝迪斯預咗開局比之前艱辛。好在依家一切都開始步入正軌，面對組織能力咁出色嘅森林，搶番一分我好滿意！」
有人歡喜有人愁，森林臨尾痛失勝局，本月初代替紐奴領軍的普斯迪高古，仍未能一嘗贏波滋味，這位60歲教頭賽後失望地說：「作客貝迪斯從來都唔容易，我哋喺上半場有唔少精彩表現，唯一想挑剔嘅係我哋未能夠把握擴大比數機會，唔可以提早奠勝。」普斯迪高古帶領森林已經接近一個月，至今踢了4場比賽，首仗英超作客阿仙奴淨吞3蛋、次戰英聯盃作客面對英冠中游史雲斯，半場領先兩球竟然反輸2:3出局、然後英超作客賽和般尼1:1，連同今仗半場領先後遭貝迪斯逼和，始終無緣首捷。要知道森林班主馬連拿基斯向來也不是一個有耐性的僱主，普斯迪高古背負壓力已經愈來愈大。
尼斯主場輸波 拉傑夫面黑
同日另一場焦點戰，意甲羅馬憑兩名中堅尼迪卡、基安盧卡文仙尼各建一功，作客以2:1勇挫法甲尼斯。今夏由阿特蘭大加盟羅馬的加斯柏連尼，領軍5戰取得4勝，這位67歲名帥賽後談到成功之道時表示：「我哋擁有一支非常強大、穩固、緊湊而且極具競爭力嘅核心隊伍，我要做嘅，只係將佢哋融合為一體！」記者在現場亦拍攝到曼聯新班主拉傑夫爵士在看台睇波，拉傑夫亦同時為尼斯班主，眼見球隊主場輸波，拉爵在鏡頭前的面色相當難睇。
