9球盛宴 意大利坐過山車
世盃外I組，以色列與意大利昨晨合演瘋狂入球騷，攜手炮製9個入球盛宴！意大利今場在兩度落後下於完場前10分鐘已曾反勝4:2，卻一度在完場前3分鐘內被以色列追和，最終靠紐卡素中場辛度東拿利於補時一分鐘絕殺對手，驚險贏5:4全取3分，過程猶如坐過山車！結果得以在積分表上壓過多賽一場的今仗對手升上次席，但仍落後榜首挪威3分。
意大利新帥加度素在6月上任，至今領軍兩仗合共轟入10球，有前無後踢法令人留下深刻印象，不過球隊今仗在實力未算強的以色列腳下，竟然狂失4球，絕對飽食驚風散！加度素賽後亦認衰：「呢場係我執教生涯最瘋狂嘅比賽，我哋有一啲好荒謬嘅失波，以色列嘅人盯人戰術好出色，我哋球員今場體能亦唔理想。不過最大問題係喺領先4:2而剩低時間唔多嘅情況，繼續搶逼係愚蠢做法，不過呢個係我嘅策略問題，唔關球員事！」他聲稱自己與教練團都需要進步：「我同教練團仲有好多地方需要改善，唔可以再咁輕易失波嘞！無論點，都多謝球員冇放棄，盡咗最大努力爭取最後勝利！」
