張學友聲帶出事 個唱半路嗌中止
冇把握完成演出着歌迷退錢
歌神張學友的《張學友60+巡迴演唱會》東莞站原本於今年6月6日至8日，在廣東東莞銀行籃球中心舉行，不過最終因為有兩天與內地高考撞期，加上附近有考場，有市民投訴並希望演唱會延期，最終主辦單位宣布演唱會改為8月29日至31日舉行。演唱會前晚（31日）尾場唱到一半時，學友疑聲帶不適宣布要中止個唱，令歌迷大感意外。
學友在演出中途突然表示：「大家都見到，開始嘅時候好難控制自己啲聲，大家都知我做咗40年，要我做一個、唔好話百分之一百，或者百分百掌握到自己滿意嘅演唱會，我係過唔到自己嗰關。今次我揀嘅歌並唔係容易唱，但冇把握可以完成今晚嘅演出，我知對我所有老師、20多位Dancers唔公平，我覺得非常抱歉，我要喺呢度中止個演唱會！」
對於突如其來的消息，全場觀眾驚嚇地發出叫聲，學友續說：「我好憎自己去取消演唱會嘅，好憎，何況喺東莞呢度，今日係第二次……上一次唔關我事㗎！我都想唱，不過就冇得唱，今次都想唱但唱唔到……」此時歌迷不停大叫「加油！」「很棒！」來安慰學友，他續說：「我都唔知點收科，我應唔應該繼續做落去呢？」
頂硬上撐到完場
歌迷叫他繼續唱下去，最後學友決定頂硬上，唱得幾多得幾多，「如果我真係唱唔到咪唱唔到囉，咁樣得唔得先？主辦O唔OK？」歌迷再高呼：「你想唱我們都聽！」學友於是說會繼續盡能力唱，若唱不到就請大家退錢。
學友直言若令團隊的努力白費會很難過，希望在場每一位都好好保重身體，下次開演唱會再見到大家，說罷就請歌迷陪自己大合唱《你最珍貴》，最終演唱會也順利撐到完場，歌迷事後也在小紅書等發文，叮囑學友好好休息。
