伊健澳門開騷 Feanna 攪亂檔
一反寡言常態變開籠雀
鄭伊健日前帶住小師妹黃淑蔓（Feanna），與音樂總監陳光榮的音樂團隊到澳門舉行一場「ENCOUNTER WITH EKIN遇見鄭伊健美高梅音樂會」，以伊健的電影歌重新編曲，全新歌單，令人耳目一新；期間Feanna亦為伊健準備小驚喜，原定唱《戀愛預告》突然變成《動地驚天愛戀過》，伊健見慣大場面處變不驚， 事後Feanna問：「點解你咁冷靜㗎？」讓伊健哭笑不得。
為了製造今次驚喜，Feanna一個月前與樂手瞞住伊健偷偷綵排。當伊健在台上聽到突然轉了歌都呆了一下，但很快就回過神繼續揮手打拍子。完騷後經理人林珊珊亦問伊健為何如此冷靜？伊健笑說：「其實我太集中做嘢，反應唔切。我原本諗住唱完《一對對》（國語版《蟲兒飛》），承接浪漫氣氛同埋觀眾手機燈，畀佢唱《戀愛預告》，點知佢轉咗歌，做乜改歌唔話我知？（畀驚喜你嘛！）哈哈，不過真係好好聽，證明大家都好樂意參與呢次演出。」
過往伊健在台上較寡言，但這次音樂會卻像開籠雀，他解釋今次是「歌友會」，而非傳統形式演唱會，「唱過好多次《友情歲月》 ，今次全新版本作為Opening好特別，好有氣氛。」觀眾反應非常熱情，唱第二首歌《一起衝一起闖》就湧到舞台前爭相與伊健握手，又送上手幅為他打氣。
預告日本開唱有新構思
今次歌單主要是電影歌，又連續唱跳多首快歌，包括《興波作浪》、《友情歲月》和《極速》等。伊健說：「都幾激㗎，究竟我體能仲做唔做到呢？但我又好想做，好想大家睇到呢個表演感受到熱情。」
有傳伊健將於日本舉行演唱會，他承認有好多想法但未落實：「好多諗法，嚟緊呢幾個月辛苦陳光榮，要諗吓點樣做一個不一樣嘅演唱會。」
