羅啟豪修煉舞功 決戰譚輝智
四王一后雲集啟德大激鬥
《中年好聲音》歌手周吉佩、羅啟豪、譚輝智、黃劍文與「中年」導師谷婭溦，昨日出席「四王一后 五聲激鬥演唱會」發布會，宣布將於8月30日在啟德體藝館激鬥一番。谷婭溦透露與輝智合唱，羅啟豪修煉舞技決戰「舞王」輝智，黃劍文則與吉吉合作彈結他。
5位歌手透露衣着打扮代表「恒星」，有「小辣椒」之稱的谷婭溦戴紅色頭飾，代表火星；譚輝智自嘲老土，代表土星；羅啟豪覺得自己性格「13點」，故穿藍色衫代表水星；吉吉笑言自己金色頭髮，代表金星，大家可以叫他「金吉」；黃劍文自言平日木口木面，代表木星最適合。
黃劍文被叫「前輩」
問吉吉選擇金星，是否代表他賺得最多錢？他說：「唔係啦，大家都賺得多，其實係被安排嘅。」谷婭溦表示為了今次演出，開了一個電話群組：「但佢哋喺群組講唔正經嘅嘢，正經嘢就私訊畀我。」吉吉解釋：「我哋今次係四王一后，咁就問係咩陣，自己諗到咩陣就係嗰個陣。」谷婭溦透露跟輝智有合唱環節，會互讚靚仔靚女，更是輝智親自作曲填詞。
有指啟德體藝館多次被《中年》歌手「霸佔」開騷，吉吉即說：「我第一次咋！」黃劍文則稱試過3次，即被其他人嗌「前輩」，他解釋都是以嘉賓身份演出。提到黃劍文早前不慎被玻璃碎片割傷手指筋，他透露康復進度良好，已能合起手掌，但左手無名指仍彈不到某個音調，要繼續努力練習彈結他，因他與吉吉會合作彈結他。問兩大「舞王」譚輝智和羅啟豪會否歌舞連場？羅啟豪說：「我都有少少修煉！」輝智即搞笑問：「係修煉定收斂？我就收斂咗，只會輕跳。」之後輝智問吉吉會否除衫騷肌，記者反問：「如果吉吉除衫，你除唔除？」輝智即縮沙說：「咁又唔會。」
今次他們演出票價最貴只是780元，價錢比較大眾化，吉吉表示票價由大會設定，應該是想令更多人入場欣賞：「好抵睇，一次過睇到唔同組合演出。」
