鄭伊健改機票 撐Kelly演唱會
銘記伸出「神聖之手」恩情
《陳慧琳Season 2 萬人結界演唱會》前晚舉行第9場，邀得電影拍檔鄭伊健擔任嘉賓。伊健笑言昔日拍落海戲時凍到震，陳慧琳（Kelly）專誠出來拉他上船，雖然未能成功，但這份恩情一直銘記於心。Kelly則爆伊健改機票擔任嘉賓，令她非常感動。
陳慧琳介紹伊健出場時透露，對方原定7月20日擔任嘉賓後離港，卻因颱風延期，成功改機票留低。兩人a合唱《甘心替代你》後，伊健分享一段鮮為人知的拍戲往事：「拍《東京攻略》（2000年上映）Ending時，我要喺零度跳海拍爆炸戲，凍到郁唔到，要等船接，點知突然見到Kelly伸出『神聖之手』！雖然拉唔到我上船，但佢特登走出嚟，呢份心意我一直記得。」Kelly聽畢大笑說：「真係全靠隻手！」
伊健繼續爆料：「當時拍動作戲搞到肌肉撕裂， Kelly竟然送盒粉紅色平安膏畀我，好感動！但真係唔多襯佢形象。」Kelly反擊說：「以前出埠最鍾意帶嘛！我同你合作多數喺海外。《東京攻略》喺東京、《幻影特工》喺馬來西亞、《盜馬記》喺布拉格，仲有30年前澳洲演唱會，所以今日專登着西芹裙歡迎你！」伊健卻笑她似「Big Bird」，又爆自己首次與人合唱《甘心替代你》，嚇到Kelly瞪大眼說：「真㗎？」
雷頌德：冇陳慧琳一定冇我
此外，音樂總監雷頌德特別從英國返港助陣，他感謝Kelly與她的經理人鍾珍：「你成日多謝我，搞到好似冇雷頌德就冇陳慧琳，其實冇陳慧琳就一定冇我，真係㗎！大家話，唔係陳慧琳邊有人有氣質唱《風花雪》？唔係陳慧琳邊有人夠清純唱《誰願放手》？唔係陳慧琳邊有人咁型唱《花花宇宙》？所以好多謝你請我嚟享受我哋呢30年嘅成果。」之後雷頌德與單立文、Joey Tang送上《一切很美只因有你》，令眼淺的Kelly眼濕濕，場面感人。
