張頴康自認惡頂 難得老婆冇離棄
張頴康與太太麥雅緻（Angie）到新城廣播為節目《Ben同Benson「chur」到行》進行錄音訪問，原來兩人相識經過跟新城廣播有關，Angie笑言：「真係關新城事，2005年我返香港之後，有聽開阿康同林盛斌、杜浚斌主持嘅《新香蕉俱樂部》，點知有一日個節目轉咗時間，我喺社交媒體問阿康，佢好快覆。」
阿康笑言：「咁啱我枱面有兩張《投名狀》戲飛，問佢有冇興趣同我一齊睇，就咁約咗佢出嚟開始。」問到兩人最欣賞對方什麼？阿康說：「佢冇放棄過我，其實好易放棄，我又係難頂，佢都唔放棄係好難發生。」Angie則最欣賞老公專一：「由啱啱拍拖到生咗3個小朋友，喺生活上佢都好細心，出門口會叮囑我小心啲、過馬路睇車，係好細心嘅表現。」
