盧慧敏拍MV被發脾氣考起
盧慧敏（Amy）推出第2首個人單曲《白牆》，靈感來自她重複卻又微妙不同的生活，展現壓抑後爆發的「Show Time」。MV還原她的日常，包括敷面膜、浸腳、邊食飯邊跳舞等，非常搞笑。她換上近10個造型，壓軸以閃爆短裙出場，更跪地忘我高歌，寄語大家找到屬於自己的舞台，做最真實的自己。
Amy坦言被發脾氣考起！MV其中一幕，髮型師不小心用直髮夾焫親她的後頸，Amy要扮嬲鬧走對方。她笑言：「我真係唔發脾氣，因為好攰。嗰個Shot要我鬧人，但佢哋演繹得非常有趣，同埋大家係幫緊我，所以好難鬧得落，係一個好大嘅挑戰。」她表示拍攝歷時兩日，其中一日正值小暑，氣溫達35度，一眾台前幕後拍得非常「溶」洽：「全部人熱到溶晒，體感溫度係48.93度！」
