嘉欣展鵬合唱 掀「巨輪」回憶
經典CP 期待再續戲緣
《Remember記得·鍾嘉欣演唱會》繼廣州、佛山及深圳後，昨晚在惠州江北體育館舉行第4站，全晚高潮位莫過於嘉賓陳展鵬與鍾嘉欣合唱《都是你的錯》，兩人曾合作熱爆劇《巨輪》，如今相隔多年再次「巨輪Re-U」，掀起無限回憶殺。
鍾嘉欣（Linda）與陳展鵬主演的經典無綫劇《巨輪》，2013年開播贏得收視和口碑。兩人相隔多年再次踏上舞台合作，掀起大家的回憶殺。Linda表示：「其實我對上一次同展鵬喺台上合唱，係大概10年前喺美國登台，之後大家就冇再見過面。」她坦言勾起不少合作《巨輪》的回憶，大讚展鵬是非常認真、心思細密的演員，是她非常欣賞的演員之一：「初認識展鵬時，覺得佢好似張學友Mix Superman。張學友係我好欣賞嘅歌手，所以我今次點歌，希望展鵬可以唱一首學友嘅歌，展鵬好好，佢真係應我要求，唱學友嘅《真情流露》。」
問Linda為何會邀請陳展鵬做嘉賓？她說：「同展鵬合作過《巨輪》，好有CP值，好想畀番觀眾一個回憶，同埋我覺得展鵬唱歌好好聽。」她指展鵬很好人，一口答應做嘉賓：「展鵬永遠都有一種好親切嘅感覺，佢好有心，好多謝佢，而且佢仲問我夾唱咩歌好，好有誠意。我哋最後揀咗《都是你的錯》，因為我哋覺得觀眾估唔到我哋會唱呢首歌，會帶驚喜畀觀眾。」Linda續說除了今次合作，相當期待可以跟展鵬再次合作演戲。
預告出治癒新歌
此外，Linda將於8月中到中山舉行第5站個唱，她形容今年是豐收一年：「今年係我嘅音樂年，工作上做到好多新嘗試，亦做到好多自己鍾意做嘅嘢，真係好感恩。嚟緊我會出幾首新歌，主題都係醫治心靈作用，只要能夠帶到力量畀人，我都會繼續做。簡簡單單做好每日工作，珍惜每次機會，就係現時我嘅生活。」
