貪靚赤腳行石堆 鄧麗欣死頂痛楚
為新歌親自填詞 斷除負面情緒
忙於籌備9月舉行演唱會的鄧麗欣(Stephy),近日推出新歌《立斷》。日前她「上天下海」拍MV,除了熱到香汗淋漓外,更要赤腳行石堆!她笑言拍攝期間要做到「懶靚」行Catwalk的效果,雖然腳板痛到飛起,但看見畫面優美,相當值得。
鄧麗欣將於9月20日在澳門威尼斯人綜藝館舉行《STEP by STEPHY鄧麗欣演唱會澳門站2025》,籌備演唱會同時,她把握時間推出新歌《立斷》,由蘇道哲編曲和監製、謝芊彤作曲,並與Stephy一同填詞。她透露收到Demo時已覺得作品很完整,除了喜歡歌曲旋律外,部分歌詞亦道出自己心聲,於是促成今次合作:「講緊一段圍繞咗我好長時間、情緒糾結嘅關係,今日自己成長咗,經歷咗咁多嘢之後,識得將呢啲情緒斷開,唔好畀自己糾結喺唔開心嘅狀態入面。入面仲有更深層嘅意義,但好多嘢唔想講得太白,希望大家聽歌、睇歌詞時思考。」
跳舞唔叻 無謂獻醜
Stephy於《立斷》MV除了「上山下海」,還經歷酷熱天氣和滂沱大雨!拍攝當日早上,Stephy於33度烈日下到海灘拍落水戲,她於石堆赤腳漫步,優雅背後卻忍受腳板刺痛。每次Cut機,Stephy都苦笑說:「我表情係咪都管理得唔錯呢?我仲要懶靚咁,但其實好痛。」
下午轉戰山頭與8位Dancers拍跳舞場面,天色突變下起滂沱大雨,幸好暴雨過後陽光普照。拍攝前,Stephy與排舞師反覆練習,再與Dancers拼湊出唯美畫面。她說:「跳舞同學仔同我跳咗啲好有意思嘅舞步,我都唔好意思話我參與跳舞,主要都係肢體形態。我唔係好識跳現代舞,無謂獻醜就唔跳太多,只係配合幾個動作。佢哋好辛苦,落雨淋濕晒、又要用紗冚住個頭,好多謝佢哋嘅參與。」
接着晚上Stephy到Studio拍投影部分,很多不同顏色的圖案投射在她的臉上,Stephy憶述一整天發生的事:「經歷咗差唔多4季,今朝就出猛太陽好熱,跟住又好潮濕有春天嘅感覺。下晝就開始落雨、烏雲密布,但好彩落完雨都拍到想拍嘅嘢,夜晚就去室內拍啲有Mood嘅嘢。」