C君拒再做無綫高層
農夫回巢拍節目 欽點胡敏芝做拍檔
組合農夫成員陸永權（陸永）、鄭詩君（C君）夥拍胡敏芝（Karen）拍攝旅遊節目《旅行最緊要近》，一向轉數快的農夫終於遇上對手，兩人被Karen激到哭笑不得。曾擔任J2（現稱TVB Plus）創意總監的C君，今次以自由身形式與TVB再合作，問到回巢再做高層的可能性？他斬釘截鐵拒絕。
採：梁靜儀 攝：北山彥
陸永、C君與Karen日前接受本報訪問，時隔四五年再合體拍綜藝節目，陸永直言與C君一齊做音樂及演出多年，日見夜見已見到悶，「合體」做節目都盡量可免則免。今次他們答應做主持，首要條件是不要悶、有新鮮感及有趣的拍檔，最終選了Karen。問到是否欽點Karen演出？C君笑言：「係冇其他人肯再同我哋拍。」其實C君早在擔任J2創意總監時已睇中Karen：「其實當時我做J2，Karen就喺（藝員）訓練班，我覺得呢個女仔幾得意，又幾好笑，又傻傻哋，安排佢主持啲J2節目，有唔少監製讚佢、用佢。到依家我哋拍節目，TVB Plus就提議我哋用番Karen拍，可能會有新元素。既然大家意見相同，用Karen當然好啦。」
農夫被後輩激親
獲前高層欽點，問Karen可有受寵若驚？她笑言：「因為當年訓練班出嚟幾個月，C君就揀咗我入J2做主持，作為新人係好難得咁快有唔同機會拍節目，當時係受寵若驚，不過又唔係好驚，係喜多啲。」
談到Karen的表現，C君指她表現稱不上「喜」出望外，反而有少少激氣。陸永指原本製作組想找一個專激他們的人，C君就笑言「搵啱人」，達成他們的原意。問Karen可知自己哪方面激嬲兩位前輩？她估自己轉數慢有關：「因為佢哋轉數好快，我又真係太慢，有時佢哋講完一個笑話，去咗第二個話題，我先識笑第一個笑話，可能咁令到佢哋好激氣囉！」事前她做足功課，看了很多節目拍攝資料，不過陸永卻說嫌她做太多功課：「我哋一齊拍嘢唔係要呢啲資料性嘅嘢，係要當一種體驗。佢好擔心我哋接唔到，後來就慢慢建立咗個信任，知我哋唔會接到，所以佢之後索性唔睇。」Karen坦言當初知道跟兩位前輩合作，心情緊張又有少少壓力，幸好合作後一掃而空。
Karen：佢哋冇鬧過我
拍旅遊節目少不免玩刺激玩意，C君笑指Karen的「刺激」玩意，就是刺激他們，他與陸永異口同聲說：「佢係可以激到我哋講唔到嘢。（遇到高手？）可以咁講。」雖然被取笑轉數慢，但Karen大讚兩位前輩：「佢哋轉數快。（缺點呢？）佢哋對後輩太好喇，佢哋真係冇鬧過我。」她自覺拍完節目後轉數快了，說話不再「一舊舊」，很希望再與兩位前輩拍第二輯。
農夫多投放時間做音樂
近年主力在內地開騷的農夫，被問與TVB可會再合作？陸永表示有可能，他們目前是以自由身形式合作。2021年出任J2創意總監一職的C君，當時以專心發展音樂事業為由，2023年中卸任，TVB總經理曾志偉曾表示會等他回巢。問C君會否回去做高層？他斬釘截鐵說：「梗係唔會啦！嗰段時間做咗一年幾，做咗好多創作，我哋都做好多幕後，唔一定喺個機構度先做到幕後，好多嘢都係我哋自己創作，遠比想像中忙碌，只可全情投入，冇得一心二用。」陸永亦稱暫時對做高層不感興趣，想多放時間做音樂。
今年是農夫出道25周年，陸永預告將會有大Project，可能不止25周年演唱會，有可能與其他單位合作，詳情稍後公布。
