希拉爾空襲「炸毀」曼城
施蒙尼恩沙基 無愧頂薪
世冠盃昨晨連場爆冷，兩支歐洲勁旅英超曼城及意甲國際米蘭，齊齊意外出局。全日最大贏家，肯定是沙特聯希拉爾新教頭施蒙尼恩沙基！在球季結束後接受希拉爾開出全球最高薪酬，離開國米，結果帶領希拉爾擊敗曼城！相反國米失去施蒙尼恩沙基即告崩潰，被巴甲球隊富明尼斯踢出局。
希拉爾與曼城合演燦爛對攻激戰，曼城在開賽9分鐘便由貝拿度施華先開紀錄，半場領先1:0。馬高斯李安納度於易邊後立即頭槌為希拉爾扳平；6分鐘後，希拉爾再憑反擊由馬爾甘單刀建功反超前2:1。曼城夏蘭特在55分鐘門前混戰下建功，追成2:2將比賽帶入加時。不過希拉爾戰將在酷熱天氣下顯示強橫體能優勢，加時先由高列巴尼接應角球頂入成3:2，即使曼城有菲爾科頓冒腳傷危險再扳平，但馬高斯李安納度於112分鐘再度頂破曼城大門，爆冷以4:3贏波晉身八強。
希拉爾4個入球有3個用頭頂入，顯示施蒙尼恩沙基針對曼城一眾中堅防空力不足弱點，空襲成功！施蒙尼恩沙基賽後自豪地說：「想贏曼城，就要好似攀登珠穆朗瑪峰咁，不惜犧牲氧氣！我同球員一齊只有3星期，你睇得到佢哋付出咗幾大努力，依家我哋可以好好享受呢個成就！」曼城領隊哥迪奧拿賽後未有怪責球員：「我哋未能把握機會，好可惜！不過依家心情唔差，我睇到好多之前睇唔到嘅嘢，尤其係球員同工作人員之間嘅良好關係，大家都好開心！」新任隊長貝拿度施華亦覺得球隊有進步，包括更衣室氣氛同比賽風格。
國米輸波 堤亞高施華抽水
至於較早前上演嘅另一仗，失去施蒙尼恩沙基的國際米蘭，意外地淨吞巴甲富明尼斯兩蛋。隊長拿達路馬天尼斯賽後接受訪問時大發牢騷：「我哋嚟美國係要全力以赴，我係隊長，我想講，如果唔願意努力挑戰獎盃嘅人，唔該佢走啦！」國米會長馬路達講明，拿達路馬天尼斯所指的是中場查漢奴古，他因為受到加拉塔沙雷斟介而申請放假。至於富明尼斯的40歲隊長堤亞高施華，賽後喜極而泣，由於他曾効力國米死敵AC米蘭，不忘抽國米水：「今晚除咗我哋，相信AC米蘭球迷都會好高興！」
