黃宗澤蔡潔 難咀出愛火
8度合作 終演夫妻
黃宗澤（Bosco）與緋聞女友蔡潔合作無間，更多次演情侶。兩人第8次合作劇集《執法者們》終演夫妻，Bosco笑言於劇中經常跟蔡潔親吻，但現實中沒有「過電」，未能咀出愛火花！
黃宗澤、馬國明、吳啟華、宣萱、蔡潔等昨日到觀塘宣傳無綫熱播劇《執法者們》，大會送上蛋糕為昨日生日的劇集總監製樂易玲慶祝。Bosco與蔡潔第8次合作，終於在《執》劇首次演夫婦，更不乏親熱戲，被內地網民封為「菠菜CP」。Bosco笑言第8次合作終於完成人生其中一個願望，就是可以一親蔡潔芳澤。他揚言收視若超過24點，會現場表演咀蔡潔，答謝觀眾支持。
問到有否咀出愛火花？他笑言：「唔會啦，錫吓又唔會生仔嘅，我錫咗佢成部劇喇，Feel好好嘅，但都係嗰句『女神不是我的』。」言下之意莫非蔡潔已名花有主？她否認說：「我嘅男朋友係工作，女人最緊要有自己事業。」
吳啟華否認現身賭場
吳啟華笑言嫌自己角色的戲份不夠多：「希望第時拍劇可以多啲戲份，過吓戲癮。不過我都認為角色有得發揮最重要，希望呢套劇『添食』啦！」他很期待與宣萱、歐陽震華等《壹號皇庭》演員再合作，並講笑稱：「可以反轉拍喜劇《犯法者們》。」提到他被指現身賭場，吳啟華說：「啲相好耐啦，我成10年冇去，因為依家拍廣告同做代言人，合約寫明唔可以涉及賭博，亦唔可以去賭場，去會俾人告，所以冇去，就算賭場嘅登台我都唔接。同埋當年其實只係小賭怡情，依家直情唔會去。」
宣萱演獄中戲獲網民讚賞，她坦言初時擔心演得不夠好：「因為未做過犯人角色，事前有啲壓力，唔知點做好。我仲搵咗前輩撈家（羅嘉良）請教點做，佢叫我喺裏面唔好笑，但我有一刻笑咗，自己睇番都覺得唔係咁滿意，可以做得更好，好忟自己。」
馬國明近日偕太太湯洛雯出席蕭正楠與黃翠如兒子的百日宴，期間與舊愛胡定欣碰面，問到可感尷尬？馬國明說：「唔會尷尬，大家都成熟。」
