譚耀文與時並進 跟年輕人學習
入行逾30年 最怕變「古老石山」
譚耀文（譚哥）與年輕演員林家熙（Locker）近日為主演的港產電影《拼命三郎》接受本報專訪，兩人均認為拍戲前相約交流，有助入戲，不用花時間磨合。Locker稱首次跟譚哥合作，感覺放心又舒服。譚哥則謙稱要向年輕人學習，入行逾30年的他不想變落後，認為要更放開自己，接受新事物。
採訪：梁靜儀 攝影：黃艾力
《拼命三郎》講述過氣江湖大佬石三郎（譚耀文飾）出獄後做代客泊車，因代兄弟出頭鬧上差館，並重遇多年沒見的兒子石頭（林家熙飾），他得知石頭得罪江湖大佬兒子，決定出頭解決紛爭，因而重遇昔日糾纏不清的兄弟。堅信只要努力總有出頭天的三郎，意外地東山再起，兒子則重新認識父親，並受到父親啟發在拳界發展，兩代「拚命三郎」在逆境中打拚。
踏出第一步約後輩傾偈
譚哥與Locker飾演父子，問到如何增進「父子情」？譚哥笑言因戲中前段父子關係未修補，雙方應要有點距離感，不過他表示為了Locker，做了他從影以來未試過的事，就是約對方見面談話。Locker笑言該次見面似跟朋友傾偈：「譚哥唔係一嚟就傾部戲，大家傾吓生活狀況，傾吓我點入行，我又八卦佢以前係點，但又冇傾到好深入。」點到即止正好配合劇情前段的父子關係。譚哥自言性格較內向，但今次為了演好角色，作為前輩便行出第一步。
星途並不平坦的譚哥讚年輕一代的EQ很高，反而是他向年輕人學習： 「相比以前自己嗰一代會好執着，跌咗落嚟就唔知點，或者唔係好願意接觸出面啲行業，依家啲年輕人就好有能量同彈性，知道自己做緊乜，所以好啟發到我應付依家呢個年代。」
譚哥拒絕落後，認為應更放開自己，接受新事物及觀念，他笑言：「我仲未Out嘅原因，係我好怕聽到人死守以前啲舊思想，Old School係唔得，偏偏三郎角色就係咁。」雖然他對「石三郎」有所寄望，但對獎項還是抱隨緣心態。Locker亦稱作為演員，當然想獲獎得到認同。問到可想「兩父子」一齊攞獎？譚哥說：「最好啦！」
