雲浩影「笨豬跳」練膽量
「仙氣女神」雲浩影（Cloud）將於8月2日在旺角麥花臣場館舉行《Finding Cloud雲浩影演唱會2025》，出道3年終迎來首個個人演唱會，她第一個反應是「終於要嚟喇」！日前她為演唱會拍MV，背景以天空藍色為主調，她穿上白色背心裙躲於流蘇布景之間輕輕探頭，猶如邀請大家踏上尋「雲」之旅。
距離演唱會還有個多月，Cloud笑言正努力減肥、練氣和訓練膽量：「我上台經常會好緊張，然後手震腳震，所以就去咗跳Bungee Jump練膽。」她憶述月初挑戰「笨豬跳」的畫面：「都係一個機緣巧合，當初有計劃宣傳演唱會，想Bungee Jump跳落去講『我要開演唱會喇』，但我驚到忘記咗，所以跳落去就講咗其他嘢，好似『好叻呀，我做到喇』！」
